पूर्व पश्चिम महेन्द्र राजमार्गको गैडाकाेट दाउन्ने खण्डमा सडक दुर्घटनामा परि ज्यान गुमाउने दिवङ्गत आत्माको शान्तिका लागि साेमबार कावासोतीमा एकाह पुराण लगाइएको छ ।
सदरमुकाम स्थित लालीगुराँस आमा समूहको आयोजनामा कावासोती २ शिव सामुदायिक वन खरकट्टा सडक खण्डमा भागवत पाठ पारायण, स्वस्तीशान्ति, हवन,नारायणवलि, व्रम्हा,विष्णु,शिवसहित षोडश पिण्ड दान, लक्षदीप प्रज्वलन गरिएको पण्डित त्रिलोचन शर्मा भुर्तेलले बताए ।
कार्यक्रममा स्थानीय नर्मदेश्वर शिवालय लगायत विभिन्न मठ मन्दिरका पदाधिकारी,विभिन्न भजन समूह,आमन्त्रित आमा समूह, स्थानीय जनप्रतिनिधि तथा श्रद्धालुहरूकाे सहभागिता रहेको थियो ।
विद्वत ब्राह्मण परिजनहरूबाट पितृ उद्धार कर्म गरी सम्पन्न उक्त कार्यक्रमको समापन हरिनाम सङ्कीर्तन द्वारा गरिएको थियो ।