काठमाडौं जिल्ला अदालतबाहिर वरिष्ठ अधिवक्ता दिनेश त्रिपाठीमाथि कुटपिट गर्ने व्यक्तिलाई प्रहरीले थुनामा राखेर अनुसन्धान गर्न सात दिनको म्याद पाएको छ । बुधबार भएको घटनालगत्तै कुट्ने व्यक्ति ललितकुमार केसी पक्राउ परेका हुन् ।
पक्राउ परेका केसीलाई सिहंदरबार वृत्तमा थुनामा राखिएको छ । प्रहरीका अनुसार उनले आफू घरजग्गा कारोबारी रहेको बयानमा बताएका छन् । तर उनी राष्ट्रिय स्वतन्त्र पार्टी (रास्वपा) सम्बद्ध व्यक्ति हुन् कि होइनन् भन्नेबारे भने प्रहरीले केही सबुत फेला पारिसकेको छैन ।
अनुसन्धानमा संलग्न एक प्रहरी अधिकारीले थुनामा रहेका केसीले हातपात गर्नुको स्पष्ट कुनै कारण बताएका छैनन् । उनले भने, 'रास्वपासँग उनको सम्बन्ध छ कि छैन भन्ने र उनले किन हातपात गरे भन्ने कोणबाट पनि अनुसन्धान भइरहेको छ ।'